دووشەممە ٠١.٠٩.٢٠٢٣ بەیانییەی ژمارە ٢
بە‌یانییه‌ی بزاڤی رۆشنگه‌ری ژنانی كوردستان سەبارەت بە
ساڵرۆژی کۆشتن|تیرۆری ژینا و هەڕەشەکانی کۆماری ئێسلامی
نزیک یەک ساڵە لە شۆڕشی «ژن، ژیان، ئازادی» تێپەڕیوە. شۆڕشێ کە بە کۆشتن|تیرۆری ژینا دەستی پێکرد.
شۆڕشی ژینا، کە بنەماکەی ئازادییە بە پێشەنگایەتی کۆمەڵگای کوییر، ژنان و تووێژی کارگەر و پەراوێزخراوەکان (نەتەوەیی، زمانی، دینی و پەنابەر)، هەر ئەم فرە رەنگی و فرە دەنگییە بووە هۆی پەرەسەندنی ئاگری شۆڕش. نەتەوەی كورد وه‌كوو نەتەوەیەک بە ئاستی وشیار سیاسی بەرزەوە لە ناو نەتەوەکانی ئێراندا له پێوه‌ندییه‌كی نزیک و راستەوخۆ لە رووی مێژووییەوە له‌گه‌ڵ حیزبەکانی كوردستان دایه و چاوه‌ڕوان ده‌كرا به هه‌مان شێوه كه خه‌ڵک به ده‌م بانگه‌وازی حیزبەکانەوە ده‌چوون، حیزبەکانیش به ده‌م داخوازیه‌كانی خه‌ڵكه‌وه بچن و له ئاستی پێگه‌یشتوویی و تێگه‌یشتوویی ئه‌وان دا هەڵسووکەوت بکەن و رۆخسارێکی گەش و شایانی كۆمه‌ڵگای یاخی و راپه‌ڕیو له ده‌ره‌وه‌ش نمایش بکەن و هەروەها بە هه‌موو شێوەیەک پێشه‌نگ بوون و وشیاری نەتەوەیی و وشیاری جێندەری كۆمه‌ڵگای كوردستان به جیهان بناسێنن. به‌ڵام ئه‌وه‌ی بینیمان به پێچه‌وانه، دووپات كردنه‌وه‌ی هه‌مان رێچكه‌ی هه‌میشه‌یی بوو به كه‌مترین ده‌رك و تێگەیشتنی دروست به نیسبەت جیاوازی دۆخی شۆڕشی ئەمجارە لە كوردستان و ئێران و رۆڵی گرنگی مرۆڤی كورد لە ئێستە و داهاتوی کوردستان و ئێراندا.
حیزبەکانی كوردستان له جیاتی بە خۆداچوونەوە و گه‌ڕانه‌وه بۆ ویستی بەرز و خواستی كۆمه‌ڵگای كوردستان و هه‌ست كردن به گرنگی کۆدەنگی و فرەرەنگی و پێویستی گۆڕینی دۆخی پیاوسالارانەی حیزبی په‌نایان بۆ نه‌یارانی كوردستان برد و به كۆبوونه‌وه و هاوپه‌یمانی له گه‌ڵ فاشیستانی دوێنێ و ئه‌مڕۆ كۆمه‌ڵگایان دووباره له خۆیان بێ هیوا كرد.
ئەم بێ هیوایی و رەشبینییە لە کاتێکدایە کە نزیک ئەبینەوە بە ساڵرۆژی کۆشتن|تیرۆری ژینا. هاوکات کۆماری ئیسلامی لە لایەک هەوڵ ئەدات تێکۆشەرانی سیاسی و مەدەنی لە کوردستان و ئێران دەستبەسەر بکات، لە لایەکی تر هەڕەشەی چەک کردنی حیزبەکانی کوردستانی رۆژهەڵات دەکات. چەک کردنی حیزبەکانی کوردستان دەبێتە هۆی خەسارێکی سیاسی، کۆمەڵایەتی و دەروونی|رەوانی چ لە ئێستەدا و چ بۆ داهاتوو، بۆیە پێمانوایە هەڕەشەی چەک کردن و بۆڵد کردنی لە لایەن میدیای ئۆپۆزیسیۆنی فارس-ئێرانی یانی دەستەمۆکردنی نەتەوەی کورد، یانی داگیرکردنی ئاو و هەواو خاک و فەرهەنگی کوردستان، یانی ژینۆساید و ئاسمیلاسیۆنی فەر هەنگ و زمانی نەتەوەی کورد لە کوردستانی رۆژهەڵات، چون ئەزموونی ئەم شۆڕشە لەم یەکساڵەدا پێمان دەڵێ و سەلماندی کە «کۆمەڵگای فاشیستی، دەسەڵاتی فاشیستی بەرهەم دەهێنێ»، یانی ئۆپۆزیسیۆنی فارس-ئێرانی دەرەوە لە راست بۆ چەپیان لە یەک خاڵدا کۆکن ئەویش پاراستنی ئێرانی «یەک زمان و یەک دین و یەک نەتەوە». بە بەرز کردنەوەی وێژمانی« مهسا» و پەرەپێدانی ئەم وێژمانە و بەردەوام دووپات کردنەوەی لە میدیای زاڵدا و لە زاری تیۆریسیەنەکانیان پێمان دەڵێن کە رەوایی ئەدەن بە سیاسەتی ژینۆسایدی سپی کۆماری ئێسلامی ئێران دژ بە نەتەوە پەراوێزخراوەکان.
بەڵام هەن تاک و گرووپی فارس زمانی ئێرانی کە لە دروشمی «ژن، ژیان، ئازادی» و هەقیقەتی فرە زمانی، فرە نەتەوەیی و فرە فەرهەنگی و جیندەری و چینایەتی ئەم شۆڕشە تێگەیشتوون و بریاڕی خۆیان داوە و بە بەکارهێنانی وشیارانەی ناوی ژینا وەکوو رەمزی شۆڕش دەرگای دیالۆگ و گفتووگۆیان کردووەتەو بۆ نەتەوەکانی دیکە. کەوابوو بوونی ئەم دەگمەن کەس و گرووپانە دەتوانێ ئاسۆیەکی روون بێ بۆ پردی پێوەندی لە نێوان نەتەوەکان لە ئێراندا.
ئەوەی بەڵام جێی مەترسی و نیگەرانییە، نەبوونی کۆدەنگی و بەرنامە و پلانی روون و کۆنکرێتە لە لایەن کۆمەڵگای سیاسی کورد لە کوردستانی رۆژهەڵات، بۆیە بزاڤی رۆشنگەری ژنانی کوردستان پاش ڕامان و تێفکرین و راوێژیکی زۆر بەم ئەنجامە گەیشت بە نووسین و بڵاوکردنەوەی ئەم بەیانییە داوا بکات لە تاکی کورد لە کوردستان و دەرەوە و لایەنە سیاسی و رێکخراوە مەدەنییەکان لە پێناو بەرژەوەندی کۆیی و نەتەوەیی و کوردستانی دیموکراتیکدا لەم فاز و قۆناخەی شۆڕشی ژینادا، بە دڵ فراوانی و لێبووردەیی لەگەڵ ئەو کەس و لایەنە سیاسیانە هەڵسووکەوت بکەن،کە بوونە هۆی زیانێکی کۆیی لەم کات و دۆخە هەستیار و چارەنووسسازەدا، لە هەمانحاڵدا هەوڵ بۆ ئاشتی ناوخۆیی بدرێ. چون تەنیا رێگای دروست و لۆژیکی و چەکی بەهێز دژ بە کۆماری ئیسلامی و دۆژمنانی کوردستان کۆدەنگی ئێمە و ئاشتی ناخۆییمانە. بۆیە لێرەوە رایدەگەینین کە چەند رۆژی داهاتوو یەکەمین هەنگاومان بۆ ئاشتی ناوخۆیی کە گەڵاڵە|کۆنسێپتی پرۆژەیەکی کۆییە بە ناو «تۆڕی نەتەوەیی ژینا» بڵاو ئەکرێتەوە و هاوکات ئەنێردرێ بۆ هەموو لایەنە سیاسی و کەسایەتیی و تێکۆشەرانی بوارە جیاوازەکان سیاسی، زانستی، فمینیستی، فیکری و فەرهەنگی، کوییر و کۆمەڵگای پەڵکەزێڕینە و ژینگەپارێزی بۆ ئەوەی لە هەنگاوی دووهەمدا هەموو پێکەوە بە بەرنامە و پلانی روون و کۆنکرێت شۆڕشی ژینا بگەینە ئەنجام، چون ئێمە وەکوو بزاڤی رۆشنگەری ژنانی کوردستان پێمانوایە شۆڕش کاتێ ئەگاتە ئەنجام و لووتکە، کە «دۆخێ/ فەزاییەکی کۆیی ئازاد» ئەرەخسێنرێ کە هەمووان، واتە هەر کەس مافی بەرابەری هەیە لەو شوێن و دۆخ و ئاستە بەرابەرەدا بتوانێ لە پێکهێنانی کۆمەڵگایەکی نوێیدا بەشدار بێ.
...
بەیانییەی ژمارە ١
